Sílafiskarar hava verið sera beinasamir og sent okkum nógvar brævbjálvar við roðslu og upplýsingum um síl. Roðsluna kanna vit gjølla. Fyrst taka vit mynd undir sjóneyku. Myndina goyma vit í einum myndabanka. Tá kunnu vit brúka myndina talgilt og kanna, hvussu gamal fiskurin er, nær hann er farin úr ánni og á sjógv, hvussu hann hevur trivist, hvussu ofta hann vitjar aftur til ánna og tílíkt.
David kannar roðsluna og skrásetir tað, sum roðslan avdúkar um fiskin. Tann vitanin verður førd inn í ein dátugrunn, sum er grundarlag undir gransking. At enda verða boð skrivað út aftur til tann, sum sendi brævbjálvan.
