Úrslitini frá Sjósílaverkætlanini 2025
Á sílaveiðu í Eiðisá. Frá vinstru: Teitur í Stórustovu, Dan Lamhauge og Sandra L. Østerø (Mynd: Kirstin Eliasen, Firum)
Í 2018 varð Sjósílaverkætlanin sett í gongd fyri at kanna møguliga ávirkan av alivinnuni á sjósílastovnin. Høvuðsendamálini eru at kanna, nær smolt fara á sjógv, og hvussu tey trívast á sjónum, serliga við atliti til lús. Alivinnan er sambært lóg skyldug at halda lúsatølini lág í mai, juni og juli fyri at verja sílasmolt, og verkætlanin skal meta um, hvørt hetta samsvarar við føroyska sjósílið.
Til kanningarnar hava ymiskar mannagongdir verið royndar, m.a. ein fella í Sandá (2019-2022) og frá 2023 merking av sílum og ein antennuskipan í Eiðisá í Norðragøtu. Harumframt hava sílafiskarar hjálpt við at senda inn roðslu, og hevur Firum veitt 50 síl við gørnum árliga.
Úrslitini vísa, at í 2025 fóru sílini á sjógv væl fyrr enn í 2024. Síl við flest lús verða skrásett um summarið, tá ið lítið avfall ger tað torført hjá teimum at lúsa seg av í feskvatni. Kanningarnar vístu, at síl nærhendis aling høvdu fleiri lús enn síl, ið liva longri burtur frá alibrúkum, men í mun til undanfarin ár, var hesin munurin ikki signifikantur. Tó skal havast í huga, at í 2025 var staðið, har veitt varð eftir sílum burtur frá aling, eitt annað enn undanfarin ár. Samanlagt varð mett, at umleið 7% av sílunum høvdu so mikið av lús, at teirra møguleiki fyri at yvirliva var lítil.
Verkætlanin heldur væntandi fram í 2026.
Frágreiðingin um Sjósílaverkætlanina er á enskum, men byrjar við einum føroyskum samandrátti.
Øll frágreiðingin frá Sjósílaverkætlanini 2025 kann lesast her
Les eisini:
Úrslitini frá Sjósílaverkætlanini 2024
Úrslitini frá Sjósílaverkætlanini 2023
Úrslitini frá Sjósílaverkætlanini 2022
Úrslitini frá Sjósílaverkætlanini 2021
Úrslitini frá Sjósílaverkætlanini 2020
Vilt tú vita meira um sjósílaverkætlanina, si meira her
Sí myndir frá PIT merkingini í Eiðisá frá mai 2025. (Myndir: Kirstin Eliasen og Dan Lamhauge, Firum)
Sílaveiða í Eiðisá.
Síl verða skrásett.
Síl verða skannað.
Starvsfólk hjá Firum á sílaveiðu í Eiðisá í góðveðrinum.
Starvsfólk hjá Firum við Eiðisá.