Føroyska laksaalingin er rættiliga ábær fyri vindi, veðri, streymi og aldu. Hetta setur serlig krøv til útgerð og er avbjóðandi fyri laksa -vøkstur og -vælferð umframt arbeiðshættir.
Umhvørvisatlit, lúsasmitta og tað, at vinnan er í stórum vøkstri hava við sær at alingin í øðrum londum breiðir seg longur burtur frá landi, og tí er vitan úr Føroyum sera áhugaverd. Fiskaaling hevur verið partur av norska granskingarsamtakinum EXPOSED, ið hevði til endamáls at menna vitan og tøkni, so at aling á ábærum økjum kann vera harðfør, trygg og munagóð. Íkastið hjá Fiskaaling var post-doc verkætlanin Salmon and the Surf, sum í samstarvi við RAO, Setrið og Hiddenfjord kannaði, hvussu alilaksur ber seg at og trívist í streymi og aldu.
Niðurstøðan var, at laksurin er meira ávirkaður av streymi enn aldu, tó at hann bæði søkir niður frá alduni og inn frá nótini, tá aldan er høg. Í streymi legst laksurin fyri tað mesta at andøva ímóti streyminum, har hann hevur ymisk onnur atferðarmynstur enn tá ongin streymur og ongin alda er.
Fiskaaling hevur í nógv ár eisini kannað streym og alduviðurskiftini á føroysku firðunum og í løtuni er ein PhD verkætlan, ið kannar aldugjørt rák á Sandsvág, í samstarvi við við Mowi Faroes og Setrið.
