Ein nýggj grein í World Aquaculture Magazine, mars 2025-útgávuni, setir sjóneykuna á eina føroyska granskingarverkætlan. Endamálið við verkætlanini er at kanna, hvussu handfaring av laksi í einum aliringi áðrenn lúsaviðgerð kann viðføra, at laksalýs detta av fiskinum og møguliga spjaðast bæði til viðgjørdan alilaks og til laks á øðrum aliøkjum.
Í hesum sambandi verður serliga hugt at eini ávísari handfaring, nevnd treinging, har laksurin verður savnaður við nót, áðrenn hann verður pumpaður umborð á avlúsingarskipið. Granskingin gevur eina dýpri fatan av, hvussu laksalús háttar sær undir treinging, og hvussu nógv lús dettur av alilaksinum undir hesari handfaringini. Eisini verður kannað, hvussu hesar "avdotnu" lýsnar kunnu festa seg aftur á nýliga avlúsaðan laks ella spjaða seg til aliøkir í grannalagnum.
Hetta er týdningarmikil vitan, bæði fyri at meta um, hvussu munadygg lúsaviðgerðin er og fyri at skipa betri avlúsingarhættir í framtíðini.
Gunnvør á Norði, granskari á Firum, hevur verið verkætlanarleiðari. Afturat henni hava Birgitta Andreasen, Kirstin Eliasen og Tróndur Kragesteen, eisini granskarar á Firum, umframt Signar Pætursonur Dam frá Bakkafrosti, luttikið í verkætlanini.
Meginparturin av fíggingini til hesa verkætlan kemur úr norska granskingargrunninum FHF, meðan Firum hevur borið restina av fíggingini.
Les greinina í World Aquaculture Magazine HER
Mynd: Sandra Ljósá Østerø
Mynd: Sandra Ljósá Østerø
